48 గంటల్లో వెళ్ళిపోవాలా? ఇంత అరాచకత్వమా?

48 గంటల్లోనే వెళ్లిపోండి

ఆంధ్రా సెటిలర్లకు జేఏసీ, టీఆర్ఎస్ అల్టిమేటం, పోచారానికి మెజారిటీ తగ్గిందని ఆందోళన
కామారెడ్డి రూరల్, అక్టోబర్ 17 : నిజామాబాద్ జిల్లాలో ఆంధ్రా సెటిలర్ల ఇళ్ల ఎదుట జేఏసీ, టీఆర్ఎస్ నేతలు సోమవారం సాయంత్రం ఆందోళనకు దిగారు. 48 గంటల్లో ఊరు విడిచి వెళ్లిపోవాలని అల్టిమేటం జారీ చేశారు. ఈ సంఘటన కామారెడ్డి మండలం గర్గుల్ గ్రామంలో చోటుచేసుకుంది.
బాన్సువాడ ఉప ఎన్నికల్లో టీఆర్ఎస్ అభ్యర్థి పోచారం శ్రీనివాస్‌రెడ్డికి మెజారిటీ తగ్గడానికి ఆంధ్రా సెటిలర్లే కారణమంటూ గర్గుల్‌లో గ్రామ జేఏసీ, టీఆర్ఎస్ ఆధ్వర్యంలో సెటిలర్ల ఇళ్ల ఎదుట ఆందోళనకు దిగారు. రెండు రోజుల్లో ఊరు విడిచి వెళ్లాలని డిమాండ్ చేశారు. తెలంగాణలో ఉంటూ ఆంధ్రా బుద్ధి చాటుకున్నారని ఆందోళనకారులు ఆరోపించారు. వారు నిర్మించుకుంటున్న ఇంటికి గ్రామ తెలంగాణ భవన్ అని పేరు మార్చారు. ఆంధ్రోళ్లను నమ్మి ఉండనిస్తే తెలంగాణకు అన్యాయం చేస్తున్నారన్నారు. విషయం తెలుసుకున్న పోలీసులు గ్రామానికి చేరుకుని ఆందోళనకారులను సముదాయించారు.

వార్నీ ఏందిరా ఇది? నాకు ఎందుకు ఓటేయలేదు అని జనాల్ని పట్టుకుని కొట్టే రోజులొచ్చేశాయా ఈ రాష్ట్రంలో..??? ఇంత అరాచకత్వం కళ్ళముందు జరుగిపోతాఉంటే ఇంకా ఓ ప్రభుత్వం ఉండాదని, మమ్మల్ని కనిపెట్టుకునుంటాదనీ నమ్మాలా? ఇది పెజాస్వామ్య దేశమేనా? ఓటు వేయడం మనుషుల ప్రాధమిక హక్కు కాదా? దాన్ని కూడా ప్రశ్నించి గదమాయించేరోజులొచ్చాయారా? వార్నీ హిట్లరు, ముస్సోలినీ ఫాసిస్టు ప్రభుత్వాల్లో కూడా ఇంత ఘోరం జరగలేదు కదరా? ఏమి చూసుకుని ఈ ధైర్యం? ఎవడి అండ చూసుకుని ఈ అరాచకత్వం? ఒక్కడు ఇదేంటని అడిగేవాడు లేడా?